Афинада Греция-Қозоғистон ишбилармонлар кенгаши очилди
22 Июнь 20:04

Афинада Греция-Қозоғистон ишбилармонлар кенгаши очилди

ATHENS. Kazinform – Грецияда Греция-Қозоғистон ишбилармонлар кенгаши иш бошлади. Қозоғистон томонидан Кенгашга таниқли иқтисодчи Жақсибек Кулекеев, Греция томонидан эса тадбиркор ва энергетика ҳуқуқи соҳасидаги нуфузли эксперт Томас Ламнидис раҳбарлик қилди, деб хабар беради Kazinform ҚР Ташқи ишлар вазирлигига таяниб.

Кенгашнинг асосий мақсади тегишли алоқаларни ўрнатиш, шунингдек, манфаатдор ташкилотларга Қозоғистон ва Греция иқтисодиётининг хусусиятлари бўйича маслаҳатлар бериш орқали савдо ва сармоя, туризм, маданият ва бошқа соҳаларда қозоқ-греция ҳамкорлигини ривожлантиришдан иборат.

Очилиш маросимида Греция ташқи ишлар вазирининг иқтисодий дипломатия бўйича ўринбосари Константинос Франгояннис Қозоғистон Грециянинг Евроосиё минтақасидаги асосий ҳамкорларидан бири эканлигини, Афина билан савдо-иқтисодий ва сармоявий ҳамкорликни ривожлантириш ниятида эканлигини таъкидлади. Греция ҳукумати вакили ушбу платформа икки томонлама ишбилармонлик алоқаларини кенгайтириш мақсадларига самарали хизмат қилиши мумкинлигига ишонч билдирди.

Ўз навбатида, Қозоғистон Элчиси Ерлан Баударбек-Қожатаев қозоқ-юнон муносабатларини ҳар томонлама мустаҳкамлаш тарафдори эканини яна бир бор тасдиқлаб, Қозоғистонда Президент Қасим-Жомарт Тоқаевнинг раҳбарлиги остида амалга оширилаётган ислоҳотлар нуқтаи назаридан икки мамлакат ишбилармон доиралари ўртасидаги алоқаларни фаоллаштириш муҳимлигини қайд этди.



Элчи Қозоғистоннинг бизнес юритиш учун қулай шарт-шароитлар яратиш ва мамлакат иқтисодиётига сармоя жалб этишга қаратаётган эътибори янги ишбилармонлик алоқаларини қуриш ва мавжудларини кенгайтириш учун мустаҳкам асос бўлишини таъкидлади.

Греция Қозоғистоннинг Европа Иттифоқига аъзо давлатлар ўртасидаги савдо ҳажми бўйича бешинчи савдо ҳамкоридир. Мамлакатлар ўртасидаги йиллик товар айирбошлаш ҳажми қарийб 1,5 миллиард долларни ташкил этади. Юнонистонда Қозоғистонда туғилиб ўсган 100 мингга яқин одам – тарихий ватанларига қайтган этник юнонлар яшайди. Жорий йилнинг 2 июнидан бошлаб мамлакатлар ўртасида тўғридан-тўғри ҳаво қатнови йўлга қўйилди.






Ўхшаш янгиликлар

Янгиликлар

Архив