Қозоғистон Тожикистон учун сунъий йўлдош алоқа каналларини ташкил қилади: 13 Декабрь, 20:55

ALMATY. Кazinform - «Республика космик алоқалар маркази» АЖ (РКАМ) Тожикистоннинг «Нет Солюшенс» МЧЖ компанияси билан шартнома имзолади. Томонлар «КаzSat-3» сунъий йўлдоши орқали Тожикистон Республикаси манфаатларини кўзлаб сунъий йўлдош алоқа каналларини ташкил этиш бўйича келишиб олдилар, деб хабар беради Kazinform мухбири.

Ҳужжатни «РКАМ» АЖ бошқаруви раиси ўринбосари Василий Леонов ва «Нет Солюшенс» бош директори Бахтовар Абдусатторов имзолади.

Шартномага мувофиқ, РКАМ АЖ 2023 йилда 58,5 даража шарқий узунликдаги орбитал позициясида жойлашган КаzSat-3 космик кемасининг транспондер қувватини тақдим этишга тайёр.

«КazSat сунъий йўлдош алоқа тизими нафақат Қозоғистон Республикаси ҳудудида, балки қўшни давлатлар ҳудудида ҳам космик алоқа хизматларини кўрсатишга қодир. Бу борада Қирғизистон, Ўзбекистон, ҳозир эса Тожикистон билан ҳамкорлик йўлга қўйилмоқда. РКАМ Марказий Осиё мамлакатларига космик алоқа хизматларини кўрсатиш бўйича халқаро бозорга чиқишни давом эттиришни режалаштирмоқда», - деди «РКАМ» АЖ бошқаруви раиси ўринбосари Василий Леонов.

Маълумки, Қозоғистонда иккита алоқа сунъий йўлдоши ҳамда «Ақкўл» ва «Кўктерек» ерни бошқариш мажмуаларидан иборат «КazSat» миллий сунъий йўлдош алоқа ва радиоэшиттириш тизими мавжуд.