Қозоғистонда ўт ўчирувчилар ва қутқарувчилар сони 1613 кишига кўпаяди – Бош вазир

ASTANА. Кazinform - Мамлакат фавқулодда хизматлар ходимлари сони ортади. Ўт ўчириш бўлимлари 380 кишига, қутқарув пунктлари 220 кишига, авария тиббиёт маркази 94 кишига, «Қазселденкорғау» муассасаси 39 кишига кўпаймоқда. Бу ҳақда Ҳукумат раҳбари Алихан Смаилов маълум қилди, дея хабар беради Кazinform.

«Бугунги кунда инсон омилларидан ташқари хавфсизлик муаммолари ва техноген ҳодисаларга фавқулодда чоралар кўриш биринчи ўринда туради. Айни пайтда мамлакатимизда селнинг олдини олиш ишлари жадал олиб борилмоқда. Ёз ҳам яқинлашмоқда, яъни ёнғин хавфи ҳам ортади. Туркия ва Суриядаги даҳшатли зилзилалар минглаб одамларнинг ҳаётига зомин бўлди, кўплаб инсонлар жароҳатланди ва уйсиз қолди. Бу ҳолат ҳар бир қозоғистонликни қайғуга ботирди. Ҳалок бўлганларнинг оила аъзоларига ҳамдардлик билдираман, Туркия ва Сурия халқига ушбу оғир даврда тинчлик ва барқарорлик тилайман. Шу билан бирга, ўта хавфли шароитларда меҳнат қилаётган, мана шундай оғир дамларда қардош турк халқига қўлини чўзаётган қозоғистонлик қутқарувчиларга ўз миннатдорчилигимни билдираман. Бу воқеаларнинг барчаси бизни фавқулодда вазиятларга жавоб бериш кучларимизни кўпайтиришга ва турли вазиятларга тайёр туришимиз учун уларни зарур жиҳозлар билан таъминлашга мажбур қилади», — деб ёзди Бош вазир ўзининг Facebookдаги саҳифасида.

Шу муносабат билан Қозоғистон Республикаси Ҳукумати «Қозоғистон Республикаси Фавқулодда вазиятлар вазирлиги фаолиятининг айрим масалалари тўғрисида»ги қарорни қабул қилди.

Ҳужжатга кўра, Қозоғистонда Мудофаа вазирлигининг янги ҳарбий бошқармаси ташкил этилмоқда. У Ақтўбе шаҳрида жойлашган. Янги бўлимда 880 киши ишлайди.

Шарқий Қозоғистон, Алмати ва Қарағанди вилоятларида Қозоғистон Республикаси Мудофаа вазирлигининг учта ҳарбий бўлинмаси мавжуд.

«Бундан ташқари, фавқулодда вазиятлар хизматлари, хусусан, ёнғин хавфсизлиги бўлинмалари ходимлари сони 380 нафарга, қутқарув станциялари 220 нафарга, шошилинч тиббий ёрдам маркази 94 нафарга, «Қазселденкорғау» муассасаси 39 нафарга кўпайди. ФВВ сафига жами 1613 киши қўшилди. Бу чора-тадбирларнинг барчаси фавқулодда вазиятларда тезкор чора кўриш даражасини, авария-қутқарув ишларининг самарадорлигини, мамлакатимиз ёнғин хавфсизлигини, тез тиббий ёрдам кўрсатишни, шунингдек, фуқаро муҳофазаси ҳарбий қисмлари ва сув тошқинидан ҳимоя қилувчи тузилмаларнинг тўлиқ ишлашини таъминлайди. Ҳукумат бу борадаги ишларни давом эттиради. Фавқулодда вазиятлар хизмати ходимларининг моддий-техник жиҳозланишини яхшилаш, қутқарувчиларнинг иш ҳақини ошириш бўйича чора-тадбирларни давом эттирамиз. Дунёда тўсатдан содир бўлаётган воқеалар одамларнинг хавфсизлиги ҳамма нарсадан устун эканини кўрсатмоқда», — дея хулоса қилди Алихан Смаилов.