Қозоғистондан ЕИ мамлакатларига ташриф буюрадиган фуқаролар учун виза режими енгиллаштирилади

BRÚSSEL. Kazinform – ҚР Бош вазири ўринбосари – Ташқи ишлар вазири Мурат Нуртилеу Брюсселга иш сафари доирасида Европанинг ички ишлар бўйича комиссари Ильва Йоханссон билан учрашув ўтказди, дея хабар беради Кazinform.

Музокаралар натижасида томонлар Қозоғистон Республикаси фуқаролари учун виза режимини енгиллаштириш бўйича расмий маслаҳатлашувларни бошлаш бўйича келишувга эришди.

М.Нуртилеу Қозоғистоннинг виза сиёсати, Қозоғистон Республикасидан Европа Иттифоқи учун миграция хатарларининг йўқлиги, Қозоғистон Ҳукумати томонидан ноқонуний миграцияга қарши кураш бўйича кўрилаётган чора-тадбирлар ва бу йўналишдаги ишларнинг бошқа муҳим жиҳатлари ҳақида батафсил маълумот берди.

Ўз навбатида, И.Йоханссон Европа Иттифоқи Қозоғистон билан ўзаро манфаатли ҳамкорликни янада мустаҳкамлашдан манфаатдор эканлигини ва томонлар фуқаролари ўртасидаги алоқаларни кенгайтиришга интилишини маълум қилди.

Европа комиссарининг фикрича, Қозоғистон ва ЕИ ўртасидаги стратегик шерикликнинг энг муҳим кўрсаткичларидан бири доимий маданий-гуманитар алмашинувни қўллаб-қувватлашдир.

ҚР ТИВ раҳбари Европа томонига конструктив ёндашуви учун самимий миннатдорлик билдириб, виза режимини енгиллаштириш нафақат қозоғистонликларнинг умидларини оқлашини, балки Қозоғистон Республикаси ва Европа Иттифоқи ўртасида ҳамкорликнинг барча кўламини ривожлантиришга сезиларли туртки беришини таъкидлади.

2017 йилдан бошлаб Қозоғистон бир томонлама тартибда барча Европа Иттифоқи давлатлари фуқаролари учун ишбилармон ҳамкорлик, туризм ва халқлар ўртасидаги алоқаларни ривожлантириш учун визасиз режим жорий қилди.

Виза режимини соддалаштириш – талаб қилинадиган ҳужжатлар рўйхатини қисқартириш, визалар муддати ва даврийлигини ошириш ва ҳ.к. ўз ичига олади.