ҚР Сенати «яшил иқтисодиёт» модели тўғрисидаги қонунни қабул қилди
ASTANA. Кazinform – Сенат «Глобал яшил ўсиш институтини ташкил этиш тўғрисидаги битимни ратификация қилиш тўғрисида»ги қонунни қабул қилди, деб хабар беради Кazinform мухбири.
«Давлат раҳбари Қасим-Жомарт Тоқаевнинг Жанубий Кореяга ташрифидан сўнг берган топшириғини бажариш мақсадида «Глобал яшил ўсиш институтига қўшилиш тўғрисида»ги қонун лойиҳаси ишлаб чиқилди. Ҳозирда Қозоғистон Республикасида карбонсизланиш сиёсати доирасида 2060 йилгача углерод нейтраллиги стратегияси ишлаб чиқилмоқда. Янги экологик кодекс қабул қилинди, соҳаларни ислоҳ қилишда мавжуд бўлган энг илғор технологияларга ўтишга йўл очилди. Шу билан бирга, бу тегишли инвестициялар жалб қилиниб, кам углеродли лойиҳалар жорий этилишини билдиради», — деди Қозоғистон Республикаси Экология, геология ва табиий ресурслар вазири Серикқали Брекешев Сенатнинг умумий йиғилишида.
Шу муносабат билан у Глобал яшил ўсиш институти ривожланган ва ривожланаётган мамлакатларга бу борадаги режа ва сиёсатларни амалга оширишда ёрдам беришини таъкидлади.
«Институт 2010 йилда ташкил этилган бўлиб, унинг асосий фаолияти «яшил ўсиш» деб номланган иқтисодий ўсишнинг янги моделини қўллаб-қувватловчи халқаро тадқиқот маркази ҳисобланади. Институт аъзо давлатлар ва ҳамкорлар билан иқлим ўзгариши бўйича ҳаракат режалари ва Иқлим мақсадларига эришишга қаратилган лойиҳаларни қўллаб-қувватлаш учун маблағларни сафарбар қилиш учун ишлайди.
«Институт миллий ҳукуматларга Париж келишуви доирасида қабул қилинган «яшил ўсиш» стратегиялари ва мажбуриятларига эришиш бўйича Миллий режаларни ишлаб чиқишда ёрдам беради», — деди вазир.
Институт фаолияти қўллаб-қувватлашнинг қуйидаги асосий турларини ўз ичига олади: атроф-муҳитга таъсирни баҳолаш, стратегия ва режалаштиришни ишлаб чиқиш, яшил лойиҳаларни молиялаштириш ва амалга оширишни ташкил этиш, шунингдек, билим алмашиш.
Ушбу Шартномани ратификация қилиш ҳеч қандай мажбуриятларни олмаган ҳолда техник ёрдамни жалб қилиш имконияти билан институтнинг эксперт салоҳияти ва тўпланган билим базасидан фойдаланиш имконини беради.
Сенат раиси Маулен Ашимбаевнинг айтишича, мазкур келишув мамлакатда «яшил иқтисодиёт» моделини жорий этишга кўмаклашишга қаратилган.
«Қабул қилинган қонун Глобал яшил ўсиш институтининг ҳамкор давлатлари билан экологик технологияларни ривожлантириш соҳасида тажриба алмашиш учун кенг йўл очади. Бу Қозоғистоннинг мувозанатли ва барқарор ривожланишига ҳисса қўшишига ишонамиз», — деди М. Ашимбаев.
Фото: firbid.cоm
Муаллиф: Руслан Ғаббасов
