Венесуелада 20 дан ортиқ киши кўчки қурбони бўлди

ASTANA. Kazinform – Венесуеланинг мамлакат шимолидаги Лас-Техериас шаҳрида камида 25 киши кўчки қурбони бўлди. Яна бир неча ўнлаб одамлар бедарак йўқолган, деб хабар беради Kazinform Euronews.com.га таяниб.

Бир неча кун аввал Кариб денгизидаги «Хулия» довули олиб келган кучли ёмғир туфайли бир қанча дарёлар қирғоқларидан тошиб кетди. Кўчкилар кўчаларни босиб кетди, сел уйлардан чиқиш йўлларини тўсиб қўйди. Қидирув-қутқарув ишларига мингдан ортиқ киши жалб этилган.

Умуман олганда, Венесуеланинг шимолий ҳудудларида ёғингарчилик ва сув тошқинлари оқибатида 20 мингга яқин бино зарар кўрган. Вайрон бўлган инфратузилма туфайли жабрланган ҳудудларга ёрдам етказиш қийин.

Мамлакат президенти минтақани фалокат зонаси деб атаган, шунингдек, Лас-Техериасда ҳалок бўлганлар учун уч кунлик миллий мотам эълон қилган.